Madaxweynaha Xukumadda Kmg ah ee soomaaliya ayaa maanta si rasmi ah xariga uga jarey tababar loo furayey ciidamo ka tirsan ciidamada mileteriga dawladda kmg ah ee Soomaaliya. Munaasabadan furitaan tababar ciidamadaasi ayaa ka dhacdey magaalada muqdisho.

Tababarkan ayaa lagu wadaa inay ka qayb qataan ciidamo tiradooda lagu sheegey 1300 oo askari kuwaasi oo lagu biirin doono tababarkooda ka dib ciidamada mileteriga dawladda kmg ah ee soomaaliya.

Madaxweynaha Somalia Shiikh Shariif ayaa khudbad dheer oo dhinacyo badan taabaneysa u jeediyey ciidamadaasi,waxaana uu ugu baaqey inay ciidamadaasi tababarkooda dhameystaan si ay wax uga qabtaan xaaladda adag ee ka jirta dalka soomaaliya.

Waxaa uu Madaxweynuhu kuu dhiiri galiyey ciidamadasi inay noqon doonaan kuwa xalinaya dhibaatada adag ee haysta shacabka soomaaliyeed,waxaana uu ka codsadey inay si wanaagsan tababarkaasi u qataan.

Ciidamadan tababarkoodu ka furmay magaalada muqdisho ayaa ah qaybtii 3-aad ee dawladda kmg ah loo tababaro,waxaana hadda diyaar u ah dawladda kmg ah ee soomaaliya 4500 oo askari kuwaasi oo tababaro ku soo qaatey dalka dibediisa.

Ahmed Aadam Gacal

Muqdisho-Gedo-News

Gedonet.com@gmail.com